Hangyoon ni Cebu City Councilor Niña Mabatid ngadto ni Mayor Edgardo Labella nga ipaubos ang tibuok dakbayan sa “lockdown” aron malikayan ang pag-usbaw sa mga kaso sa COVID-19.
Kini human nga nag-post ang konsehal sa social media diin nabalaka kini sa kahimtang sa mga fronliners kinsang ni-atiman sa mga pasyenteng gipang-quarantine.
Sa pagpakighinabi sa Bombo Radyo ngadto ni Mabatid, nagkanayon kini nga dili pa andam ang mga tambalanan alang sa posibleng pagsaka sa ihap sa nga COVID-infected patients sa Cebu City.
Matud sa konsehal nga wala gibutyag dayon sa Department of Health (DOH) kung pila ba ang nagpositibo sa coronavirus gumikan kay ila pa kining i-reconfirm.
Una nang gikumpirmar ni DOH-7 Director Dr. Jaime Bernadas nga anaa sa Research Institute for Tropical Medicine (RITM) ang upat ka samples aron masuta kun nagpositibo ba kini sa maong sakit.
Apan wala gikwestyon sa konsehal ang kapasidad sa DOH sanglit gusto lang niyang makahibalo kung epektibo ba ang mga testing kits nga bag-o lang niabot sa Sugbo.
Sa laing bahin, mas maayo alang ni Mabatid nga ipaubos ang dakbayan sa Sugbo sa lockdown gumikan kay kini lang ang bugtong paagi aron mahunong ang pagkatap sa virus.
Kini human nga nabantayan sa konsehal nga daghan gihapon ang maglakaw sa gawas bisan pa man og gipaubos na sa general community quarantine ang dakbayan.
Gibarugan ni Mabatid ang maong sugyot tungod kay alang kini sa kasayuran ug kaluwasan sa tanan.
Sa pagkakaron, mihangyo ang konsehal sa mga mulupyo nga mosanong dayon sa mga kamanduan nga giluwatan sa Cebu City Government sama lang sa pagpuyo sa balay.
Gipaubos gihapon ang dakbayan sa Sugbo sa general community quarantine gumikan sa hulga sa coronavirus disease. (gn)
