CEBU CITY — Gisuspenso una sa Archdiocese of Cebu ang tanang mga eucharistic celebrations ug mga kalihukan sa simbahan aron kalikayan ang pagkatap sa coronavirus disease o COVID-19.
Matud ni Archbishop Jose Palma nga kini na mismo ang rekomendasyon gikan sa Philippine Center for Infectious Disease and Epidemiology (PCIDE).
Tungod niini, suspendido ang mga kalihukan nga maoy maghimo og bagang duot sa tawo sama lang sa misa, prusisyon, dawn rosaries ug uban pa.
Samtang mitambag usab ang arsobispo sa mga magpakasal ug magpabunyag nga i-postpone una hangtud nga mabalik na sa normal ang tanan.
Mi-awhag usab si Palma nga mahimong makasalmot ang publiko sa santos nga misa pinaagi sa internet o sa mass media.
Samtang apektado usab ang mga kalihukan sa simbahan ning panahon sa Kwaresma sama lang sa Palm Sunday Mass hangtud na sa Easter Vigil.
Nagkanayon si Arsobispo Palma nga bisan pa man og naglisud kini sa mga kabag-uhan, angayan kining sabton sa publiko isip gugma ngadto sa Sugbo ug sa Ginoo.
Mi-awhag usab ang arsobispo sa katawhan nga mag-ampo sa Oratio Imperata inig bagting sa simbahan matag udto ug sa alas-8 sa gabii.
Samtang nakita sa usa ka layko ug human life advocate nga si Dr. Rene Josef Bullecer nga nasakitan si Palma sa maong deklarasyon.
Matud ni Bullecer nga mopatigbabaw gayud ang kaayuhan sa tanan ilabi na ning gi-atubang nga hagit karon sa nasud.
Gitataw usab niini nga abli gihapon ang simbahan alang sa mga gustong mag-ampo ug mamalandong.
