CEBU PROVINCE – Nagsilbing pahimangno alang sa mga Sugbuanon ang mga gilusad nga operasyon sa kapulisan sa Probinsya sa Sugbo batok ilegal nga sugal human daghan ang nangasikop sa tigbakay sulod sa tulo ka adlaw.
Kini ang pamahayag ni PCol. Engelbert Soriano, ang hepe sa Cebu Provincial Police Office (CPPO) human nasikop ang 42 ka mga indibidwal sa tigbakay sa mga managlahing lugar sa Probinsya sa Sugbo.
Matud pa ni Soriano nga padayun ang CPPO sa paglusad ug kampanya batok sa tanang matang sa ilegal nga sugal ug dili kini mohunong sa kampanya niini.
Nagkanayon si Soriano nga tungod kay nahimo na nga tradisyon ang tigbakay sa mga nagkadaiyang lugar, sa kalaay sa mga tao, ingon man nga nahimo na kining ‘habit’ hinungdan nga wala’y hunong ang pagpahigayon ug tigbakay sa mga nagkadaiyang lugar.
Gidili gihapon ang mga tigbakay gumikan kay anaa paman kita sa COVID-19 pandemic.
Magsilbi kini nga warning alang sa tanang mga indibidwal nga magpahigayon ug tigbakay nga gidili gayud ang tigbakay ug dili gayud muhunong ang kapulisan sa pagpahigayon ug operasyon batok sa mga malapason. | JG
