Mipahimangno sa publiko ang Cebu Police Provincial Office (CPPO) nga ginidili ang mga menor-de-edad nga mga indibidwal nga mu-check-in sa mga hotel, motel, lodging house ug susamang mga establisyemento sa Adlaw sa mga Kasing-Kasing (Valentine’s Day) inig Pebrero 14.
Kini ang gipahibalo sa kapulisan sa probinsya pinaagi sa social media post niini nga matod pa kay nanukad ang maong restriksyon sa mga balaod ug lokal nga ordinansa nga nagtinguha nga panalipdan sa pagpangabusar ug eksploitasyon ang mga kabatan-onan.
Gipahimangnoan sab niini ang mga ginikanan, guardians, ug mga establisyemento nga dili i-tolerate sa CPPO ang kalapasan sa maong mga balaod.
Striktong ipatuman sa mga kapulisan dili lang sa Pebrero 14 apan sa ubang mga adlaw ang maong pagbawal sa mga menor-de-edad ug kung kinsa ang ilang masuta nga mubuhat niini kay paatubangon nila sa silot sa balaod.
