PROVINCE OF CEBU- Padayon ang hugot nga kampanya sa Cebu Police Provincial Office (CPPO) batok sa ilegal nga droga, kriminalidad, ug uban pang kalapasan sa balaod, ubos sa liderato ni Police Colonel Abubakar Udang Mangelen Jr.
Base sa rekord, 42 ka anti-drug operations ang gihimo sulod sa usa ka semana nga misangpot sa pagkasikop sa 67 ka drug personalities ug pagkakumpiska sa 126.54 gramos nga shabu nga gibana-banang nagkantidad og ₱860,472.00.
Gipasaka na sa korte ang 105 ka kaso batok sa mga nasikop.
Sa laing bahin, 77 ka mga warrant of arrest ang gilusad batok sa mga wanted persons diin 63 ang nadakpan, lakip ang pito ka Most Wanted Persons.
Gihingusgan usab sa CPPO ang kampanya kontra loose firearms, diin 11 ka armas de fuego ang nakumpiskar, 10 ang nadakpan, ug usa ang boluntaryong mitahan sa iyang armas.
Sa illegal gambling operations, 16 ka tawo ang nadakpan sa 14 ka operasyon ug nakarekober og ₱4,853.00 nga bet money.
Sa kampanya batok sa paglapas sa lokal nga ordinansa, 1,143 ka operasyon ang gihimo, nga misangpot sa 751 ka gipamulta, 263 ka gipahimangnoan, ug ₱395,900.00 ang nakolekta nga multa.
Matud ni PCOL Mangelen Jr., pagpamatuod kini nga tinuod ug sinsero ang ilang serbisyo publiko.
Giingon sa opisyal nga padayon ang ilang kampanya alang sa kalinaw ug seguridad sa Sugbo, nga walay pabor-pabor sa pagpangpatuman sa balaod.
