Nakahatag og bati nga impresyon sa publiko ang gihimong cross-examination sa depensa batok sa saksi sa impeachment hearing tungod sa medyo bastos ug walay pagrespeto nga pamaagi sa pagpangutana ni defense lawyer Mark Vinluan.
Gipahayag ni Atty. Jojo Lacanilao, lead convenor sa Duterte Panagutin Network, nga dili epektibo ang gipakitang pamaagi sa depensa tungod kay imbes nga tutokan ang argumento, nahimo hinuon nga personal ug bastos ang pagtratar sa saksi nga si kanhi Sandiganbayan Presiding Justice Amparo Cabotaje-Tang.
Matod ni Lacanilao, mahimo unta nga gamiton sa depensa ang pag-angkon sa saksi nga wala siya kahibalo sa pipila ka detalye sa kaso ni Vice President Sara Duterte aron sukdon ang iyang kahanas.
Apan tungod sa pamaagi ni Atty. Vinluan, nawala ang pokus sa legal nga isyu ug napukaw ang negatibong reaksyon sa publiko.
Gipasabot usab ni Lacanilao nga ang pagpresentar kang kanhi Sandiganbayan Presiding Justice Ma. Theresa Dolores C. Gomez-Estoesta isip expert witness gihimo aron matunod ang legal framework bahin sa unexplained wealth ug magiyahan ang mga senator-judges sa pag-assess sa kaso batok sa Bise Presidente.
Gidugang niini nga ang pagka-walay kahibalo sa saksi sa ubang detalye sa impeachment dili ikonsiderar nga kahuyang sa testimonya tungod kay ang kahanas niini anaa man sa probisyon sa criminal law.
