Mipahimangno sa saktong pamatasan sa kadalanan ang pangu sa City of Talisay – Traffic Operations & Development Authority nga si Jonathan “Joy” Tumulak subay sa gisaulog karong semahuna nga Road Safety Week nga gipangulohan sa Department of Transportation – Land Transportation Office (LTO) ug Land Transportation Franchising and Regulatory Board diri sa Central Visayas.
Gibutyag kini ni Tumulak sa eksklusibong pakighinabi sa Bombo Radyo Cebu Newsteam diin matod pa niini dili babag na karon sa mga motorista ang pagkat-on sa mga saktong pamatasan sa pagmaneho (defensive driving) kay mahimo na kini ma-access sa internet.
Dugang pa sa opisyal nga kinahanglan sab nga sweto ang nagmanehong rayber sa mga lagda sa trapiko nga gipatuman sa kadalanan aron mupatigbabaw ang disiplina nga usa sa mga panukaran sa kaluwasan sa publiko.
Sigon niini nga dapat ipatigbabaw ang kalmadong utok basta anaa sa dalan aron malikayan ang ‘road rage’ ug defensive driving ang batasan sa pagmaneho.
Pahimangno niini sa publiko nga dili lamang karong semanahuna sa pagsaulog sa Road Safety Week kini hinumduman sa mga motorista apan sa tibuok panahon kung magmaneho sa kadalanan.
