CENTRAL VISAYAS- Gisaulog sa Department of Agriculture Regional Field Office 7 (DA-7) ang ilang ika-128 nga anibersaryo pinaagi sa usa ka “ Partners Pasasalamat ” aron tagaan og pasidungog ang mga sektor nga kaabag sa pagpalambo sa agrikultura sa Central Visayas.
Gipangunahan ni DA Regional Executive Director Angel C. Enriquez, CESO III, ang maong kalihokan karong adlawa, Hulyo 3, 2026, diin iyang gipasalamatan ang mga lokal nga kagamhanan, kooperatiba, ug mga tigpaluyo sa grassroots sector.
Gipasiugda ni Enriquez ang dakong papel sa mga mag-uuma sa paggamit sa mga gi-apod-apod nga post-harvest facilities ug makinarya aron masiguro ang food security sa rehiyon.
Usa sa mga nag-unang gipunting sa DA-7 mao ang pagpalambo sa mga high-value crops sama sa kape ug mais nga dako og potensyal sa merkado aron mapataas ang kita sa mga mag-uuma.
Lakip sa mga gihatagan og pinasahi nga pag-ila mao ang Bombo Radyo Cebu (DYMF), nga nakadawat og Plaque of Recognition isip aktibong kaabag sa pagpalapad ug pagpadayag sa mga impormasyon ug programa sa agrikultura ug pangisdaan.
Personal nga gidawat ni Bombo Radyo Cebu Station Manager Mary Divine Grace Cuello ang maong pasidungog.
Kini nga maong pag-ila magsilbing inspirasyon sa pagpadayon sa amoang responsableng pagserbisyo ug pagsuporta sa mga programa nga makatabang sa mga mag-uuma, mangingisda, ug sa tibuok komunidad.
