Temporaryong gidili sa hepe sa Department of Agriculture nga si Francisco P. Tiu Laurel sa pag-import sa mga buhi nga baka, karne, o mga produkto sa karne, ingon man ang parte sa baka, semilya sa baka, ug uban pang produkto gikan sa United Kingdom tungod sa kaso sa Bovine Spongiform Encephalopathy o kon BSE o mas nailhan nga “Mad Cow Disease” pinaagi sa Memorandum Order No. 20.
Nasayran nga ang temporaryo nga import ban gipatuman tungod sa usa ka insidente sa classical strain, C-type BSE nga nadiskobrehan sa South Ayrshire, Scotland niadtong 10 Mayo 2024.
Diin gikomprimar kini sa World Organization for Animal Health – World Animal Health Information System (WOAH- WAHIS) ug sa opisyal nga sulat nga nadawat sa DA gikan sa UK Chief Veterinary Officer.
Ang sakit nga Mad Cow mahimong makahatag og peligro sa kahimsog sa tawo ug makaapekto sa industriya sa kahayupan sa Pilipinas hinungdan nga gipatuman ang import ban.
Subay niini, ang DA mopatuman og mas estrikto nga testing sa tanang umaabot nga karne ug baka nga by-products, apil na ang buhing mananap ug by-products gikan sa beef processing, aron maseguro nga ang mga wala’y impeksyon nga produkto lang ang makasulod sa nasud.
