Gimandoan ni Department of Agriculture (DA) Secretary Francisco Tiu Laurel Jr. ang National Food Authority (NFA) nga sugdan na ang pagbalhin sa ilang buffer stocks ngadto sa Visayas isip pagpangandam sa paglusad sa P20/kilo nga programa sa bugas ubos sa departamento.
Matod sa kalihim, molanat og pipila ka semana ang pagbalhin sa stocks sa bugas gikan sa mga bodega sa NFA partikular na ang gikan sa Mindoro paingon sa nagkadaiyang dapit sa Kabisay-an.
Una niini, gisiguro usab sa buhatan ang clearance alang sa pagbaligya sa bugas gikan sa Commission on Elections (Comelec), nga kabahin sa saad sa kampanya ni Presidente Ferdinand Marcos Jr. sa dihang napili kini niadtong 2022.
Samtang, ang buffer stocks gikan sa Mindoro ibutang sa mga bahin sa Kabisay-an nga limitado ang produksiyon sa bugas sama sa Cebu, Negros Island, Samar ug Leyte.
Ang mga lokal nga kagamhanan sa Kabisay-an nagsuporta niining inisyatiba sa DA ug andam nga mosalmot niini nga programa.
