CEBU – Gipasalamatan ni Cebu Provincial Governor Gwendolyn Garcia ang Department of Agriculture nga gipangulohan ni Secretary William Dar, sa suporta nga gihatag alang sa Sugbuanong Busog, Luwas, ug Himsog (SUGBUsog) program sa probinsiya.
Matud ni Garcia nga dako ug tabang ang pakig-alayon sa probinsiya sa Sugbo sa DA national gumikan kay mao kini ang naghatag ug ‘seedlings’ sa mga entrante sa household level, purok, barangay, municipal ug city level.
Nanghinaut ang gobernadora nga magpadayon ang ilahang pakig-alayon sa DA ilabi na niining panahon sa pandemya nga kinahanglan nga adunay makaon ug pangita ang mga hilabihang naapektohan.
Gawas sa DA, gipasalamatan usab ni Garcia ang mga nagkadaiyang mayor sa kalungsoran ug dakbayan sa probinsiya, ingon man ang mga barangay kapitan, purok leaders ug mga evaluators sa malampuson nga ikaduhang hugna sa SUGBUsog program.
Sigon pa nga dili magmalampuson ang maong programa kung ang provincial lang ang saligan. Gipahigayon kagahapong adlawa ang awarding sa mga midaug sa naasoy nga programa sa Capitol Social Hall kauban si Sec. Dar kinsang mihatag usab sa iyahang keynote speech.
