METRO MANILA-Gisiguro sa Department of Agriculture (DA) nga adunay haom nga burial site o lugar nga ilubong sa mga baboy nga kinahanglang ihawon tungod sa epekto sa African Swine Fever (ASF).
Matud ni DA Assistant Secretary for Swine and Poultry Constante Palabrica, aduna nay giila ang ahensya nga pila ka central burial sites kon sa diin dal-on ang mga baboy.
Dugang pa, nga kabahin kini sa mas lapad nga kontrol sa ahensya ug sa kadugayan mapugngan ang pagkaylap sa virus gikan sa mga apektadong lugar karon padulong sa mga una nang nalimpyohan.
Sukad sa outbreak sa Pilipinas tungod sa ASF, nius-os pag-ayo ang populasyon sa mga baboy sa nasud.
Gikan sa miaging 12.7 milyon sa 2019, niabot lang kini sa 9.9 milyon sa katapusan sa 2023.
Base sa datus sa Bureau of Animal Industry (BAI), ang ASF mikaylap sa 17 ka rehiyon sa tibuok Pilipinas ug apektado ang 74 ka probinsiya.
Sugod karong ikaduhang semana sa Agosto, aduna pay 64 ka lungsod ug 22 ka probinsiya sa tibuok Pilipinas ang apektado sa ASF.
