Nihangyo si Department of Agriculture Secretary Francisco Tiu Laurel Jr. ngadto sa Bureau of Customs aron ipang-apod-apod ang 580 metriko tonelada sa smuggled frozen mackerel nga niabot sa Manila Port sa miaging buwan ngadto sa mga residente nga grabeng naapektuhan sa bag-ong mga bagyo.
Sa usa ka pamahayag, si Laurel nagkanayon nga nasuta sa ilang ahensya nga ang natala nga toneladang frozen mackerel haom nga konsumo sa tawo ug mahimong ihatag sa Department of Social Welfare and Development (DSWD) aron ipang-apod-apod sa mga apektadong residente isip kabahin sa ilang nagpadayon nga relief operations.
Gibanabana nga moabot sa P178.5 milyones ka pesos ang kinatibuk-ang kantidad sa smuggled frozen mackerel nga nasakmit sa BOC gikan sa 21 ka cointaners sa pantalan sa Manila.
Samtang, mahinumdoman nga sa miaging plano sa mao nga ahensya, gusto nilang gamiton ang mga smuggled frozen fish isip dugang ayuda sa mga naapektuhan sa bagyong Kristine.
