-- ADVERTISEMENT --

Gipahugtan pa sa Department of Agriculture (DA) ang ilang kampanya sa pagpamakuna batok sa African Swine Fever (ASF), diin hapit na moabot sa tunga sa milyon ka mga baboy ang nabakunahan ug 65 porsyento na sa mga apektadong lugar sa nasud ang nakabangon.

Sumala ni Agriculture Secretary Francisco P. Tiu Laurel Jr., nag-unang tumong niini nga programa nga mapabalik ang lokal nga produksyon sa baboy sa kanhi niining gidaghanon sa wala pa miigo ang krisis sa ASF niadtong 2019, diin miabot sa gibana-banang 13 ka milyon ang populasyon sa mga baboy sa tibuok Pilipinas.

Base sa taho sa Bureau of Animal Industry (BAI), mokabat na sa 499,008 ka dosis—o 99.8 porsyento nga utilization rate—ang nadapat sa pito ka mga probinsya, lakip na ang paggamit sa AVAC ASF Live Vaccine nga gikan sa nasud sa Vietnam.

Gawas sa pagpamakuna, gipalig-on usab sa ahensya ang depensa sa lebel sa kabarangayan pinaagi sa Community Animal Biosecurity Interventions (CABI), uban sa pagpanghatag og kapin sa P49.824 milyon nga pinansyal nga ayuda ngadto sa mga apektadong magbababoy sa walo ka mga rehiyon.

Bisan pa man niining maong mga kalampusan, gibutyag sa DA nga aduna pa gihapoy aktibong mga kaso sa ASF sa 236 ka mga barangay sulod sa 23 ka mga probinsya, samtang 716 ka mga dapit ang gipailalom karon sa buffer zones.

-- ADVERTISEMENT --

Tungod niini, subling nanawagan ang buhatan alang sa mas estrikto nga pagpatuman sa mga lakang sa biosecurity aron hingpit nang mapapas ang maong sakit sa hayop.