Gimandoan sa Department of Agriculture (DA) ang ahensya nga ubos niini nga bag-uhon ug pauswagon ang mga plano aron maatubang ang epekto sa El Niño.
Kini aron malikayan ang dakong epekto sa taas nga hulaw sa suplay ug presyo sa pagkaon.
Sumala ni Agriculture Secretary Francisco Tiu Laurel Jr., ang mga leksyon nga nakat-unan gikan sa miaging El Niño kinahanglan gamiton aron mas maandam ang gobyerno.
Ang mga pagpangandam naglakip sa pagpalapad sa irigasyon, pag-adjust sa mga iskedyul sa pagtanom, paghatag og mga liso nga makasugakod sa hulaw ug pagmonitor sa mga suplay sa pagkaon.
Nagplano usab ang DA nga motabang sa mga mag-uuma sa mga lugar nga dili kaayo apektado sa El Niño, lakip ang paggamit sa cloud seeding ug solar-powered irrigation aron madugangan ang tubig para sa mga umahan.
Ang ahensya mohatag usab og crop insurance ug financial assistance sa mga mag-uuma nga naapektuhan sa hulaw.
Nagpasidaan ang DA nga ang produksiyon sa bugas mahimong mokunhod sa ikatulong kwarter sa 2026 tungod sa El Niño.
