METRO MANILA-Sugdan na karong buwan sa Agosto ang trial alang sa 150,000 nga mga bakuna batok sa African Swine Fever (ASF).
Matod sa Department of Agriculture, nga ipaubos sa controlled trial ang 150,000 ka doses sa AVAC African swine fever (ASF) vaccine gikan sa Vietnam ug kini gipaabot nga magpadayon hangtod sa buwan sa Setyembre.
Asoy ni DA Secretary Francisco Tiu Laurel Jr., ang maong mga bakuna itanyag nga libre sa mga commercial farms, semi-commercial, ug clustered backyard farms ubos sa hugot nga pagdumala sa DA.
Sa pagkakaron, ang mga guidelines nga angay sundon sa pagpatuman sa maong programa gi-finalize na, uban sa gipahigayong public consultations.
Gihimug-atan usab ni Laurel nga dili pugson ang mga tag-iya sa umahan ug mga boluntaryo lamang ang mopahigayon sa trial.
Ipahigayon ang naasoy nga trial sa mga lugar nga adunay natala nga kaylap nga epekto sa ASF, partikular sa Batangas ug Mindoro.
Kung gani epektibo kini, i-endorso sa FDA ang maong vaccine alang sa katapusang pag-apruba ug pagrehistro alang sa commercial use.
