CEBU – Sa nagka-init nga tensyon tali sa Russia ug Ukraine, mas nisaka pa ang ihap sa mga sibilyan ang namatay sa maong kagubot kini gumikan na usab sa mga missiles o airstrikes nga gipanglabay sa Russian forces sa kaatbang nga Ukrainian forces.
Sa maong panghitabo, wala malikayi nga lakip sa mga maigo o mabombahan ang mga tunghaan ug balay-tambalanan nga gilantaw karon nga usa ka dakong kalapasan sa internasyonal nga balaud.
Gibutyag ni Dr. Clarita Carlos, UP-Diliman Professor, nga supak sa balaod sa Geneva Conventions.
Kaylap nga gihubit sa Geneva Conventions ang batakang katungod sa mga binilanggo sa panahon sa gubat (mga sibilyan ug mga personahe sa militar), nagtukod ug mga panalipod alang sa mga samaran ug mga masakiton, ug naghatag ug mga panalipod alang sa mga sibilyan sa sulod ug palibot sa usa ka sona sa gubat.
Apan matod pa ni Carlos kung tan-awon pagbalik ang nahimo usab nga pagpangatake sa America ug Western allies gibombahan usab sa maong mga nasud ang mga hopsital sa Syria, Iraq ug Afghanistan.
Gitataw usab sa professor nga kung i-prosecute man gani si Putin tungod sa gihimong pagpamomba sa mga tunghaan ug hospital sa Ukraine kinahanglan lakip sa gukdon ang America ug Western allies gumikan silang tanan ang sad-an.
