Nahitabo ang ASEAN Foriegn Ministers Retreat kagahapong adlawa, Enero 29, kung diin lakip sa mga nahisgutan mao ang pipila ka mga isyu sama sa isyu sa nasud nga Myanmar, Code of Conduct sa West Philippine Sea.
Matod pa ni Prof. Rejene Lakibul, usa ka PolSci Professor sa University of San Carlos, nga importante ug angay lang nga nahisgutan kining mga matang sa mga isyu kay ang ASEAN gibuhat isip usa ka regional organization para motabang og salbar sa mga disagreement ug uban pang kakulian.
Atol sa ekslusibong pakighinabi sa Bombo Radyo Cebu newsteam kaniya, gidugang ni Lakibul nga importante karon ang role sa nasud nga Pilipinas isip host country sa ASEAN rong tuiga labi na nga adunay papel sa priority agenda pamaagi sa paghatag og finality sa code of conduct sa hisgutanan sa kadagatan.
Gitataw usab ni Lakibul nga tanang desisyon nga mapagawas atol sa mga panagtapok sa ASEAN, gikinahanglan nga consensus kini o nagpasabot nga ang tanang miyembre sa ASEAN nalakip sa pagmugna niina nga partikular nga desisyon.
Ingun man iyaha usab nga gipaambit og nganung nigahin og labing taas nga panahon kini code of conduct kabahin na sa kadagatan nga adunay kalambigitan sa Pilipinas ug China, kay giingong adunay legal implementation nga wala mauyunan sa duha ka nasud.
