PROVINCE OF CEBU-Gi-anunsyo sa Cebu Provincial Government nga ang dakbayan sa Carcar maoy mo-host sa gipaabot nga 2023 Pasigarbo sa Sugbo karung Agosto.
Atol sa meeting sa mga event committees gahapon, Hunyo 15, nahukman ni Governor Gwen Garcia nga ibalhin ang venue sa festival ngadto sa bag-ong Carcar City Sports Center tungod sa mga renovation nga gihimo karon sa Cebu City Sports Center.
Muabot sa 50 ka mga contingents gikan sa mga component cities ug munisipyo sa Cebu Province ang muapil alang sa street dancing competition ug sa grand ritual showdown nga ipahigayon karong Agosto 27, 2023.
Matod sa kapitolyo, ang street dancing competition adto ipahigayon sa Carcar City Hall diversion road para pagsiguro nga dili mabalda ang mga sakyanan sa dalan sa Natalio Bacalso national highway.
