MANDAUE CITY-Nihimo og laing lakang ang dakbayan sa Mandaue aron maseguro ang patas nga katungod sa mga indibidwal nga lainlain ang Sexual Orientation, Gender Identity, and Gender Expression (SOGIE).
Diin gipirmahan ni Mayor Jonas Cortes ang Implementing Rules and Regulations (IRR) sa Anti-Discriminatory Ordinance sa dakbayan kauban ang LGBT Champion City Treasurer Atty. Regal Oliva sa hall of fame sa Mandaue City Hall niadtong Miyerkules, Hulyo 10.
Ingon man gipasigarbo ni Cortes ang kamahinungdanon sa balaod arun sa pagpakita sa ilang dedikasyon sa paghimo sa usa ka Mandaue diin ang tanan mabuhi nga wala’y kahadlok sa diskriminasyon ug ang matag tawo gihatagan og gitagad nga patas.
Ang IRR naghatag ug detalyadong mga giya kon unsaon pagpatuman ang ordinansa diin magsilbi usab kini nga giya sa mga miyembro sa LGBTQ+ sa proseso nga ilang mahimo kung malapas ang ilang mga katungod sa syudad.
Ang Anti-Discriminatory Ordinance base sa Sexual Orientation, Gender Identity, and Gender Expression (SOGIE) una nga napasar sa balaod niadtong 2016 apan wala hingpit nga napatuman tungod sa pagkawala sa IRR.
Matod ni Oliva nga bisan wala ang IRR, ang dakbayan nipasaka og kaso batok sa mga tawo nga nakahimo og diskriminasyon sa Mandaue pinaagi sa Anti-Discriminatory Ordinance ug Safe Spaces Ordinance.
Subay niini ang mga makalapas sa ordinansa pamultahon og P5,000, apan si Oliva niingon nga ang ordinansa nag-uban usab sa Safe Spaces Act nga adunay silot nga P500,000.
