NAGA CITY, CEBU-Gitudlo sa pag-usab ang dakbayan sa Naga sa habagatang Sugbo nga maoy mu-host sa Cebu Provincial Meet nga gikatakda sa umaabot Pebrero 2 hangtod 7, 2025.
Kini mahiuyon sa desisyon sa Provincial School Borad nga gilangkoban sa mga kadagkuan sa edukasyon sa tibuok lalawigan nga sila DepEd Assistant Regional Director Atty. Fiel Almendra, Cebu Province Schools Division Superintendent Dr. Senen Paulin, City Schools Division Superintendents ug ni Cebu Provincial Governor Gwendolyn Garcia niadtong Biyernes, Enero 10.
Mao kini ang ikaduhang higayon nga mu-host aang maong dakbayan sa tinuig nga provincial-wide school tournament diin ang kataposang higayon kay niadtong nakalabayng Marso 2024 nga gitanyag nga pinaka-unang Provincial Meet human sa pandemic lockdown.
Ang maong kalihokan kay paglangkoban sa 24 ka mga sporting ug cultural categories nga duwaan sa mga elementary ug high school student-athletes sa 44 ka mga competing municipalities sa Sugbo diin ang mga mananaog niini maoy murepresentar para sa Central Visayas Regional Athletic Association (CVIRAA).
Ang mga city divisions mosalmot sa sports meet karong tuiga isip pasiuna sa ilang hingpit nga pagsalmot sa Provincial Meet sa sunod tuig.
Dili sama sa ubang probinsya, ang Cebu Provincial School Board naglakip sa mga representante gikan sa Commission on Higher Education (CHED), Technical Education and Skills Development Authority (TESDA), ug mga city divisions nga adunay kaugalingong school boards nga independente sa Provincial School Board.
Ang integrasyon sa mga city divisions sa Mandaue, Talisay, Naga, Toledo, Bogo, ug Carcar sa Provincial School Board naghimo usab kanila nga benepisyaryo sa flagship initiatives sa Kapitolyo sama sa Sugbo School Feeding Program ug sa tinuig nga pag-apod-apod sa school supplies.
