CEBU CITY-Gihandom sa dakbayan sa Sugbo ang ika-145 nga adlaw nga natawhan ni Don Sergio Osmeña Sr. o ang gitawag nga “Grand Old Man of Cebu”.
Gitambongan sa mga opisyal sa dakbayan ang maong kalihokan, kauban ang kapulisan ingon man ang pipila ka mga sakop sa Osmeña clan, ug kini gipahigayon sa may Osmeña Boulevard, ning dakbayan.
Gibatbat ni Acting Mayor ug Vice Mayor Raymond Alvin Garcia, ang kasaysayan ni Don Sergio Osmeña, Sr. isip ikaupat ug bugtong Cebuano nga presidente sa Pilipinas.
Gihimug-atan ni Garcia ang kamahinungdanon sa paghandom sa usa ka Sugbuanon nga nagpatik og dakong bahin sa kasaysayan sa nasud, diin dili angayan nga makalimtan ilabi na sa natad sa politika.
Kahinumdoman nga niadtong buwan sa Hunyo ning kasamtangan nga tuig, nagbani-og sa mga balita ang pagpukaw sa kasaysayan ni Don Sergio Osmeña, Sr. diin nasuta sa usa ka nabantogan nga forensic genealogist, Dr. Todd Lucero Sales, nga ang amahan sa kanhi presidente dili si Don Pedro Lee Gotiaco, usa ka Cebu Chinese Tycoon, inay usa ka merchant nga gikan sa laing inila nga pamilya nga Cebuano sa panahon sa Katsila.
