CEBU CITY-Nideklarar og water crisis ang kagamhanan sa dakbayan sa Sugbo tungod sa epekto sa El Niño phenomenon.
Kini ang gitino ni Mayor Michael Rama, diin ang gihimo niini nga deklarasyon gumikan sa mga hagit nga giatubang sa dakbayan gumikan sa epekto sa El Niño.
Gani, gipaambit niini nga ang kagamhanan sa dakbayan nangandam na sa El Niño phenomenon sukad pa niadtong Marso 2023, ug kinahanglan usab nilang hingusgan ang pagpangandam ning higayuna ilabi na nga gilaumang mosaka pa ang heat index.
Subay niini si Rama nipatawag og convergence meeting uban sa iyang gitudlo nga mga board member sa Metro Cebu Water District ug Cebu City Disaster Risk Reduction and Management ingon man ang mga konsehal sa dakbayan ug ubang hingtungdang ahensya aron matubag ang krisis.
Mipasalig usab kini nga makalaom ang syudad nga makahatag gihapon sa panginahanglan sa tubig sa mga lumulupyo ug giawhag ang mga Sugbuanon sa pagkonserbar sa tubig.
