Nisaulog ang kagamhanan sa Dakbayan sa Sugbo sa anibersaryo sa kagawasan sa dakbayan pinaagi sa usa ka wreath-laying ceremony nga gipahigayon sa Cebu Veterans Memorial sa Plaza Independencia niadtong Marso 27, 2026.
Gipangulohan ni Mayor Nestor Archival ang maong kalihokan nga gipasiugdahan sa Cultural and Historical Affairs Commission (CHAC) aron pasidunggan ang kaisog ug sakripisyo sa mga bayaning Sugboanon nga nakigbisog alang sa kagawasan sa siyudad.
Naghalad usab og mga buwak si Mayor Archival uban nilang Cebu City Police Office (CCPO) Director PCol. George Ylanan ug CHAC Commissioner Christian Joseph Bonpua.
Samtang, atol sa mensahe sa Mayor, gihatagan niini og gibug-aton ang kamahinungdanon sa paghinumdom sa kasaysayan ug ang pag-ila sa kabilin sa mga beterano nga maoy nahimong dalan sa kalamboan nga natagamtaman karon sa mga Sugboanon.
Nanambong usab sa maong kalihokan si Raymund Paul Taboada, ang Chief of Staff sa bise mayor nga nirepresentar kang Vice Mayor Tomas Osmeña.
Misaksi usab ang mga miyembro sa Veterans Federation of the Philippines Region 7, mga kapulisan, ug mga kadagkoan sa departamento sa city hall nga gipangulohan ni City Administrator Engr. Albert Tan aron paghatag og pasidungog sa mga haligi sa kagawasan sa Sugbo.
