Mapasigarbohon si Cebu City Councilor Dave Tumulak gumikan kay opisyal nang gisugdan ang paghatag og libreng sakay gamit ang nga green bus sa Dakbayan sa Sugbo, kay gawas niana, ang Dakbayan sa Sugbo pa usab ang nakatanyag niini sa pipila ka mga LGU’s, ug gikabutyag niya nga resulta kini sa pakighinabi niya ni Cebu City Mayor Nestor Archival pag nilabayng semana.
Matod ni Tumulak, kini nagtumong sa paghatag og libreng sakay sa mga katawhan, ilabi na karon walay puas ang pagsaka sa mga presyo sa mga produktong lana.
Mao kini ang gikabutyag ni Tumulak atol sa eksklusibong pakighinabi sa Bombo Radyo Cebu Newsteam kaniya diin iyang gidugang, nunot sa epekto nga gihatag sa pagsaka sa presyo sa mga produktong lana, kini nga lakang nila nagtumong sa paghatag og tampo sa mga katawhan pamaagi sa libreng sakay.
Gitino usab sa konsehal nga ang maong libreng sakay molungtad hangtod na nga mauli-an na o mabalik na sa normal ang presyo sa sa mga produktong lana.
Apan, sa kasamtangan, gumikan kay wala pay senyales nga mokunhod na ang mga presyo niini, padayon gihapon ang pagpangtanyag og libreng sakay alang sa mga katawhan.
Samtang, gitino usab ni Tumulak nga nag atubang karon og hagit ang panudlanan sa Dakbayan sa Sugbo sa hisgutanan na kabahin sa fuel budget alang sa mga government owned vehicles ug mga sakyanan sa tanang barangay sa Dakbayan sa Sugbo.
Hinungdan nga karon, nagpahibalo na ang Dakbayan sa Sugbo sa tanang nagkadaiyang opisina nga ang ilahang alokasyon sa fuel, kung pananglit sa konsehal, aduna kini gitaganang 150 ka litros matag buwan.
