CEBU CITY-Gipanghingusgan pa sa lokal nga kagamhanan sa dakbayan sa Sugbo ang pakigbatok sa African Swine Fever (ASF).
Gipahibalo ni Cebu City Councilor Jun Alcover, chairman sa Committee on Agriculture, nga matag adlaw ang ilahang pag-edukar sa mga hog raisers sa dakbayan sa pakigbatok sa maong sakit sa baboy arun nga dili na kini mukatap pa sa ubang ka barangayan.
Matud pa, nakasulod naman sa dakbayan ang maong sakit, hayan ang buhaton na lang mao ang paglikay nga mukatap pa kini pag-maayo hinungdan nga gipanghingusgan ang pagpatuman ug disinfection sa mga tangkal gamit ang chlorine, ingon man nga dili gayud pakan-on ug lamaw ang mga baboy.
Giingong gikinahanglan gayud nga sundon sa mga magba-baboy ang biosecurity program arun nga dili masudlan ug ASF ang ilahang mga backyard.
Gidugang pa ni Alcover nga gipatuman usab nila ang matag adlaw nga pagkuha ug blood samples sa mga baboy ug hinuon sa pagkakarun wala may lain pa ang nagpositibo sa ASF.
Gisiguro sa konsehal nga maningkamot sila nga dili na mukatap ang maong sakit gumikan kay dako unya kini ug epekto sa ekonomiya sa dakbayan.
