CEBU CITY- Nakadawat og “bomb threat” ang Ayala Malls Central Bloc sa Cebu IT Park kagahapon, Biyernes, Hulyo 3, 2026.
Kini human gikatahong adunay nadawat nga text message ang usa sa mga empleyado sa maong mall nga nagpabahala nga adunay bomba sa mismong palibot niini. Gumikan niini, daling miresponde ang mga sakop sa kapulisan lakip na ang Special Weapons and Tactics (SWAT) ug Explosive Ordnance Disposal (EOD) team aron sa pagpahigayon og initial security sweep.
Lakip nga nakisusi si Cebu City Mayor Nestor Archival aron sa pagpanguna ug pagplano sa imbestigasyon.
Nagduda ang mayor nga ang rason nganong sunod-sunod ang maong mga hulga sa seguridad mao ang presensya sa usa ka indibidwal nga gusto lang manggubot sa komunidad. Tungod niini, gipaningkamotan sa kagamhanan ug sa mga awturidad nga ma-trace ang nagpasiugda sa maong text.
Gipahimangnoan usab sa mayor ang suspek nga mapasakaan gayod kini og tukmang kaso gumikan sa paghatag og kahasol ug kabalaka sa publiko.
Apan human sa halos usa ka oras nga pagpahigayon og inspeksyon, hingpit nga gideklarang luwas ang mismong mall pasado alas 7:45 sa gabii ug mibalik na sa normal ang operasyon niini.
Nahitabo ang maong pagpanghulga human sa laing “shooting threat” nga natigayon usab sa usa ka pribadong tunghaan sa dakbayan sa Sugbo.
