CEBU CITY– Dakong sunog ang mipukaw karon sa mga residente sa Basubas Compound sa may Brgy. Tipolo, Mandaue City, Cebu.
Sa inisyal nga imbestigasyon, nagsugod ang sunog sa panimalay sa usa ka Alma Basubas kung diin namat-an nalang sa mga residente nga dako na ang kayo. Lakip nga nasunog ang lain pang compound nga mao ang Maharlika ug Espina compound.
Sigon ni Brgy. Konsehal Eric Estrera nga dunay mga huhungihong nga usa ka cellphone nga na over-charged ang hinungdan sa maong sunog apan duna usab taho nga matud pay dunay mibahad nga dunay mahitabo nga sunog sa naasoy nga barangay butang nga ila pa usa nga sutaon unsa ka tinood.
Gisaka sa Task force Bravo ang alarm status sa naasoy nga sunog kung diin hingpit kini nga gideklara nga undercontrol pasado alas 5 karong buntag.
Samtang gilamoy usab sa kayo ang pipila sa mga grade 7 classrooms sa Tipolo National Highschool.
Matud ni Edgar Espina ang admin 5 sa DepEd Mandaue nga nabalaka sila sanglit ang tunghaan unta ang himoong evacuation center.
Apan ila matud pa karong giplanohan ang scheduling of classes apan temporaryo usab nga kanselado ang klase karong adlawa.
Gipasalig usab niini nga safe matud pa ang soft copy sa ilang mga school documents.
Gibana-bana nga muabot sa 1,000 ka panimalay ang naabo ug hapit tanang mga fire victims ang walay nasalbar.
