CEBU CITY — Gisuta sa mga kabumberuhan kung gituyo ba ang akong sunog nga niulbo kaganihang sayo sa buntag sa Club Kawayan, Brgy. Mambaling, dakbayan sa Sugbo.
Daling miresponde ang mga sakop sa Cebu City Fire Department human nadawat ang alarma sa takna nga alas-5:29 sa buntag ug giisa kini sa second alarm pagkataud-taod.
Apan nakontrolar ug napawong ang dakong ka’yo human nakigkumbati ang mga kabumberuhan sulod sa halos usa’g tunga ka oras.
Base sa pasiunang imbestigasyon, unang niulbo ang ka’yo sa panimalay nga gipanag-iya ni Rabin Siacor hangtud nga nikaylap kini ngadto sa 59 ka mga panimalay.
Matud sa usa sa mga nasunugan nga si Alberto Zumbal, usa ka barangay tanod, nga gituohang naglalis ang tagtungod sa balay sa wala pa niulbo ang sunog.
Dugang pa sa tanod nga nagkalisud ang mga silingan sa pagpawong sa ka’yo gumikan kay walay klarong agas ang tubig.
Gibana-banang mikabat ngadto sa P150,000 ang natalang danyos sa maong trahedya apan walay natalang pagkaangol.
