USA — Imbes nga moreklamo, nagkatawa na lang ang usa ka dalaga sa Milledgeville, Georgia human nga nakadawat kini og linahi nga matang sa cake — usa ka marijuana-themed birthday cake.
Paborito sa 25-anyos nga si Kensil Davis ang animated movie nga “Moana” ug gusto niini nga himoong Moana-themed ang maong birthday cake.
Mi-order ang inahan ni Kensil sa usa ka bakeshop sa maong birthday cake apan ang pagdungog hinuon sa tindera kay “marijuana”.
Ug na-deliver gayud sa ilang panimalay ang marijuana-themed nga birthday cake.
Matud ni Kensil nga bisan pa man og na-misinterpret sa tindera ang cake nga ilang gi-order, gi-appreciate nila gihapon gumikan sa kalami niini.
Sa kasamtangan, wala pa mihatag og pamahayag ang bakeshop nga gi-orderan ni Davis.
Dugang pa ni Kensil nga nagkatawa usab pag-ayo ang inahan sa dihang nasayran nga marijuana-themed cake ang ilang nadawat imbes nga Moana-themed birthday cake.
Gusto unta sa bakeshop nga ilisan og Moana-themed cake apan wala nila panumbalinga ang maong kasaypanan sanglit nalamian man kini.
