CEBU – Subay sa mga kontrobersiya kalabot na sa kakuwang og pagpang-hoard sa supply sa mga sinakong asukar, gibisita sa Bombo Radyo News Team ang usa sa kaniadto nga sugarmill sa probinsya sa Sugbo.
Atol sa pagbisita, nasayran nga 10 ka tuig na ang nakalabay dihang nasira ang Durano o Danao Sugar Mill niadtong 2011.
Sa eksklusibong pakighinabi sa security guard sa maong edipisyo nga si Cesar Olipapa, gibutyag niini nga nahimo kining guardiya sa maong sugar mill sukad pa niadtong Disyembre 21, 2005.
Saksi kini kaniadto sa nindot nga dagan sa sugarmill ingon man ang daghang mga customer nga moduaw sa maong lugar apan karon mismong ang tag-iya na lamang ang moduaw niini.
Nahinabi usab sa atong team ang kanhi driver ni Marie Miranda nga usa sa planters sa Medellin nga si Doroteo Bocog.
Matod pa ni Bocog nga kaniadto kung mag-ani sa tubo ang iyahang amo sa Medellin mobiyahe kini paingon sa Danao Sugarmill aron didto magpagaling apan tungod sa wala pagkasinabtanay nahunong.
Tataw niini nga nindot kaayo ang galingan kaniadto sa Danao Sugarmill.
