Nakakuha og atensyon online ang panaglalis sa social media tali sa aktres ug negosyanteng si Dani Barretto ug komedyanteng si Dennis Padilla human sa pag-guest ni Dani sa podcast ni Kylie Verzosa nga “Almost Honest.”
Sa maong podcast, gihisgutan ni Dani ang ilang mga kasinatian sa pagkabata, lakip na ang giingong pagsiyagit ug tensiyon sulod sa ilang panimalay, bisan wala niya direktang nganli kung kinsa ang iyang gipasabot.
Human ma-post online ang clip sa interbyu, daw mipalag si Dennis Padilla ug miingon nga gusto niyang “tubagon punto por punto” ang mga pahayag ni Dani.
Bisan pa man, ang maong mga komento ni Dennis gitangtang na, apan dali kining na-screenshot ug gipakaylap sa pipila ka netizens sa social media.
Sumala ni Dani, daw nakalimot na si Dennis nga kaniadto nagpuyo sila sa usa ka balay. Matod niya, nahinumdom pa siya nga matag buntag silang magmata tungod sa giingong pagsiyagit ni Dennis.
Giingon usab ni Dani nga adunay mga higayon nga motawag si Dennis sa iyang mga anak sa dili angay nga oras nga usahay mosangpot sa mainit nga panaglalis.
Nagkadaiya ang reaksyon sa mga netizens sa pagbinayloay og mga pahayag sa duha, samtang gikataho usab nga gitangtang ni Dani ang pipila sa iyang mga komento online.
Sa pagkakaron, wala pa opisyal nga mitubag si Dennis Padilla sa pinakabag-ong mga pahayag ni Dani Barretto.
