-- ADVERTISEMENT --

Mikabat na sa P237 milyon ang kadaot sa sektor sa agrikultura sa Sugbo tungod sa epekto sa Very Strong El Niño gikan Oktubre hangtod Nobyembre 2026, nga nakaapekto sa 1,468 ka ektarya sa siyam ka lungsod ug 2,995 ka mag-uuma.

Busa, nag-andam ang Provincial Agriculture Office aron mapakunhod ang posibleng mas dakong kadaot, pinaagi sa P16.8 milyones nga mitigation plan nga naglakip sa paghatag og drought-resistant seeds, water pumps, water storage drums ug uban pang agricultural assistance.

Subay niini, mipahimangno ang DOH-7 sa posibleng pagsaka sa heat-related illnesses ug uban pang sakit tungod sa El Niño, hinungdan nga gideklarar niini ang Code White Alert aron masiguro ang kaandam sa mga ospital ug health facilities.

Sa pikas bahin, gipakunhod sa Metropolitan Cebu Water District ang pagkawala sa tubig ngadto sa 29 porsyento sa ikatulong quarter karong tuiga, gikan sa 33 porsyento sa unang quarter. Kini nagtugot sa ahensya nga mabawi ang mas dakong bahin sa suplay sa tubig.

Ang maong pagkunhod nagtumong sa gitawag nga “non-revenue water” (NRW)—tubig nga gihimo o gipalit sa MCWD apan wala makahatag og kita tungod kay nawala kini pinaagi sa mga tulo sa tubo, ilegal nga koneksyon, guba nga mga metro sa tubig, o uban pang konsumo nga wala mahisakop sa rekord.

-- ADVERTISEMENT --

Tumong sa ahensya nga ipaubos pa ang NRW ngadto sa 27 porsyento sa katapusan sa tuig, ug ngadto sa 25 porsyento sa unang quarter sa 2027. Kini nga lakang makabawi og dugang lima ngadto sa walo ka milyon ka litro nga tubig matag adlaw nga magamit alang sa distribusyon.