LAPU-LAPU CITY, CEBU- Mikabat sa P3-milyones ang danyos sa miulbong sunog sa Sitio Sto. Niño, Barangay Basak, dakbayan sa Lapu-Lapu niadtong Dominggo sa gabii, Septiyembre 29, 2024.
Matud pa ni Fire Officer III Jopet Obiña, ang fire investigator sa Lapu-Lapu City Fire Station diin nasuta nila sa ilang inisyal nga imbestigasyon ang balor sa danyos nga muabot sa kapin P3-milyones.
Dugang pa niya nga ilang gipanglantawan ang alegasyon nga ang maong sunog nagsugod sa usa ka kusina sa usa sa miulbong panimalay.
Giisa sa first alarm ang sunog ug gideklarar nga under control mga alas 10:53 sa gabii. ug gideklarar nga fire out alas 11:01 sa gabii.
Miabot sa 5 ka mga balay ang naugdaw nga naglangkob sa 38 ka mga indibidwal.
Kasamtangang bakwit sa Bag-ong Kababayen-an Office sa Barangay Basak Hall ang mga nasunogan nga daling nakadawat sa tabang gikan sa kagamhanang dakbayan.
