Panahon karon sa mga mahinungdanong adlaw sa mga estiyudante, ang moving up ceremonies, recognition ug graduation.
Apan unsang pagkaunsaa sa nahitabo sa moving up ceremony sa mga day care students sa Barangay Sirao, bukirang bahin sa Dakbayan sa Sugbo, tungod kay imbes malipayon ang mga ginikanan, magtutudlo ug estudyante, nahimo naman hinuon kinin kontrabersyal tungod ang Day Care Supervisor, giingong nangasaba sa mga teachers samtang nagpahigayon sa moving up ceremony.
Sa maong senaryo, nahunong sa makadiyot ang seremonya sa dihang giingong nangasaba ang maong supervisor sa duha ka magtutudlo, kay matod pa, nangayo kini sa third evaluation sa mga estudyante, una ipadayun ang seremonya.
Nakuhaan kini og video sa pipila ka mga ginikanan ug ingun man nikatag usab sa social media ang maong panghitabo hinungdan nga nakaani kini og lain-laing reaksyon.
Samtang subay sa pakighinabi sa Bombo Radyo Cebu newsteam kang Porchia Basmayor, ang pangu sa Department of Social Welfare and Services (DSWS), iyang gikabutyag nga nakadawat na sila og resolution sa Sirao Barangay Council, diin gikinahanglan pa kining i-review, samtang ang nahisgutan nga supervisor, gipahimo na usab og written incident subay sa nahitabo.
Dugang usab niya nga sa kasamtangan, ubos pa sa ebalwasyon ang maong supervisor basi sa performance niini, ilabi na nga under pa kini sa Job Order (JO).
Sa pikas bahin, eksklusibong nahinabi usab sa Bombo Radyo Cebu newsteam ang kapitan sa Barangay Sirao nga si Felix Limotan, ug gikabutyag niya nga agi’g suporta nila sa mga magtutudlo sa day care center, niduso sila og resolusyon nga naglangkob sa pagpaningkamot nga ma aksyonan sa saktong buhatan ang gihimo sa supervisor.
Samtang nahinabi usab sa team si Grace Solano, usa sa mga magtutudlo sa Sirao Day Care Center, kinsa perting kasagmuyoa sa panghitabo.
Ingun man nga tumang kaguol iyang nabati atong higayona kay gawas nga nahunong ang graduation ceremony sa mga bata, napakauwawan usab sila sa ilahang habig tungod kay giingong wala motuman ang maong supervisor sa kung unsa ang gimando niini sa unang higayon nga kabahin sa EECD Checklist.
