DUMANJUG, CEBU-Nadiskubrehan nga naglutawlutaw sa Sitio Basdiyot sa Barangay Calaboon, lungsod sa Dumanjug, sa habagatang Sugbo ang patayng lawas sa usa ka dakong mananap sa dagat nga nakahatag og katingala sa mga residente sa maong dapit.
Sa ekslusibong pakighinabi sa Bombo Newsteam kay Regil Tacoloy Bani, residente sa maong lugar nga una nga nakita ang nasangpit nga isda niadtong Domingo sa hapon, Nobyembre 17.
Dugang pa, ang mga lokal sa maong dapit mihulagway sa nilalang nga usa ka higanteng isda, lagmit usa ka matang sa stingray, nga nailhan sa lokal nga ngalan nga “Salanga.”
Nakita kini nga adunay duha ka sungay ug usa ka taas nga ikog ug nahinumduman nga adunay susama nga mga panghitabo nga gitaho kaniadto.
Ang ubang mga lokal nagtuo nga ang isda mahimong sobra sa 100 ka tuig ang edad, tungod sa kadako ug hitsura niini.
Ang mga awtoridad lakip na ang lokal nga kapolisan ug mga opisyal sa Bureau of Fisheries and Aquatic Resources (BFAR) ug Department of Environment and Natural Resources (DENR) kay padayon pa nga nag-imbestiga aron makatabang sa pag-ila sa maong isda.
