Gipaneguro sa Department of National Defense (DND) ang igong manpower ug assets, bisan pa sa sunodsunod nga mga bagyo nga niigo sa nasod.
Aduna nay tulo ka mga bagyo ang niigo sa Pilipinas karong buwan sa Septiyembre ug ang kasamtangang bagyong Opong maoy ikaupat.
Nunot niini, nipasalig si DND Sec. Gilberto Teodoro Jr. nga ang search, rescue, ug humanitarian operations assets sa nasud pabiling andam ug igo sa pagtubag sa bisan unsang panginahanglan, sa lain-laing bahin sa nasud.
Gawas sa mga ekipo sa Office of Civil Defense, siya nag-ingon nga ang air, naval, ug uban pang mga asset sa transportasyon sa Armed Forces of the Philippines (AFP) andam nga magdala og mga hinabang ngadto sa hilit nga mga dapit o mopahigayon og search and rescue operations sa mga lugar nga gibahaan.
Matod niya nga ang maayong koordinasyon tali sa mga ahensya sa gobyerno dako usab og tabang sa kaylap ug one-time nga pagtubag sa mga apektadong komunidad, diin ang nagkalain-laing serbisyo sama sa medikal, pagkaon, sanitasyon, ug uban pa gidala dayon ngadto sa publiko.
Gipaneguro usab sa opisyal ang dinaliang deployment sa manpower sa mga apektadong lugar alang sa nagkadaiyang serye sa operasyon.
Bisan tuod siya niingon nga ang deployment sa mga sundalo sa nagkalain-laing lugar nagpabilin isip kabahin sa ilang nag-unang katungdanan, ang gidaghanon sa mga tropa sa gobyerno nga makahimo sa pagtubag sa kalamidad ug humanitarian nga mga operasyon nagpabilin nga igo.
