CEBU – Gisita sa usa ka traffic enforcer ang usa ka delivery rider sa Puerto Princesa City, Palawan apan walay dakop nga nahitabo inay naghatag hinuon kini og good vibes dihang nasuta nga dili gyud tawo ang angkas sa motorsiklo.
Sa nagviral nga hulagway sa social media , makita nga gisita sa enforcer ang delivery rider gumikan wala magsul-ob og helmet ang angkas niini.
Ug sa dihang giduol sa mga enforcer ang motorsiklo, didto na naklaro nga mannequin diay ang ni-angkas.
Sa usa ka taho, nasayran nga wala mahibal-i sa rider kung unsaon pagdeliver ang maong mannequin tungod sa kadako niini.
Hangtod nga nakahuna-huna kini nga isakay ang mannequin sama sa usa ka tawo nga nagbackride.
Wala raman hinuon ticketi sa enforcer ang delivery rider ug luwas ra kini nga mibiya.
Gawas sa good vibes nga dala, gisaludo usab sa mga netizen ang mga traffic enforcer sa ilahang ka-alerto ug pagtuman sa ilang trabaho.
