METRO MANILA-Nagtuo ang kampo ni kanhi Presidente Rodrigo Duterte nga usa ka demolition job ang pagkalambigit sa pangalan sa kanhi presidente sa extra judicial killings ilabi na sa pagpatay sa tulo ka Chinese drug lords nga gipatay sulod sa Davao colony niadtong 2016.
Matud pa ni kanhi Presidential Legal Counsel Salvador Panelo, “in full swing” ang demolition job batok sa kanhi presidente.
Kini nunot sa gibutyag sa duha ka mga piniriso nga sila si Fernando Magdadaro ug Fernando Tan nga dunay kalambigitan ang kanhi Presidente sa pagpatay sa tulo ka Chinese.
Matud pa ni Panelo, gigamit karon sa mga kaatbang sa kanhi Presidente ang mga convicted inmates nga nag-atubang og kasong murder ug drug trafficking aron i-link si kanhi Pang. Duterte sa pagpatay sa tulo ka Chinese detainee.
Si Magdadaro ug Tan niangkon sa Quad Committee nga ilang gipatay ang tulo ka Chinese base sa mando ug bugti sa minilyon ka dolyares ug sa ilang kagawasan.
Gitataw ni Panelo, walay kapildihan ang mga saksi nga konbiktado tungod kay gisentensiyahan sila sa tibuok kinabuhi nga pagkabilanggo.
Apan, tataw kaayo nga adunay presyo ang maong mga testimonya.
Matod ni Panelo, kon tinuod nga gipatay nila ang tulo ka Insek tungod sa kuwarta ug kagawasan, mamakak usab sila sa kalambigitan sa kanhi Presidente bugti sa kuwarta ug kagawasan sa pagguba sa mga Duterte.
