Nasakitan si Dennis Padilla tungod sa petisyon nga gisang-at sa iyang anak nga si Claudia Barretto sa korte aron legal nga ilisan ang iyang apelyido gikan sa Baldivia ngadto sa Barretto.
Ang tinuod nga apelyido ni Dennis mao ang Baldivia, nga mao usab ang apelyido nga gigamit sa iyang mga anak sa iyang kanhing asawa nga si Marjorie Barretto, lakip na nila si Julia, Claudia, ug Leon.
Gipaambit ni Dennis ang hulagway sa atubangan nga bahin sa petisyon ni Claudia sa korte. Dili kaayo klaro ang uban pang detalye sa dokumento tungod kay gitabunan kini sa iyang emosyonal nga mensahe.
Matod pa niya, kung ang iyang kasubo mao ang kalipay sa iyang anak, iyang dawaton kini. Giingon usab niya nga ang iyang gugma kang Claudia magpabilin ug dili mausab.
Dugang pa niya sa iyang caption nga iyang gihigugma ug girespeto ang desisyon sa iyang anak, bisan pa man nga dili malikayan nga siya masakitan niini.
Kahinumduman nga naminyo si Claudia kang Basti Lorenzo niadtong Abril 8, 2025. Kung paboran sa korte ang iyang petisyon, mahimo nang Claudia Isabelle Barretto Lorenzo ang iyang tibuok nga ngalan.
Niadtong 2014, ang kamagulangang anak ni Dennis kang Marjorie nga si Julia Barretto mao ang unang mi-petisyon sa korte aron ilisan ang iyang apelyido gikan sa Baldivia ngadto sa Barretto.
