Gidonar sa aktor nga si Dennis Trillo ang cash prize nga iyang nadaog gikan sa iyang Best Actor Award sa 2024 Metro Manila Film Festival Gabi ng Parangal, ngadto sa Persons Deprived of Liberty (PDL’s).
Sa social media account sa manager ni Dennis nga si Jan Enriquez, malipayon niyang gibutyag sa publiko kung giunsa pagdonar ni Dennis ug sa iyang asawa nga si Jennylyn Mercado ang tibuok kantidad sa cash prize nga iyang nakuha sa awards night niadtong Disyembre 27.
Matud pa niya sa iyang post, siya ang gitahasan nga modawat sa cash prize sa aktor nga giingong iya dayong gitunol ngadto kang JC Rubio nga konektado sa mga grupo sa PDL diin gikan ug inspirasyon ang ‘Tree of Hope’.
Ingon man nga gipasalamatan siya sa manager sa aktor sa kaayo nga anaa niya diin gikasing-kasing gayud ni Dennis ang leksyon nga ilang gipakita sa salida nilang ‘Green Bones’.
