CEBU CITY- Miisyu na sa Cease-and-Desist Order ang buhatan sa Department of Environment and Natural Resources – Central Visayas (DENR-7) batok sa nagdumala sa Binaliw landfill sa makalilisang nga landslide nga nahitabo niadtong Enero 8, 2026.
Ang kamanduan nagpunto sa Prime Integrated Waste Solutions, Inc. aron hunungon ang tanang landfill operations diin ang rescue and retrieval operations lang una ang gitugotan sa maong dapit.
Nasuta sa mga sakop sa Environmental Management Bureau (EMB) sa DENR-7 niadtong Enero 9 nga adunay “imminent grave or irreparable environmental damage” ang pasilidad.
Giklaro sab sa DENR-7 nga ang ilang ahensya nakigtambayayong na sa mga local government units sa Sugbo aron masiguro ang pagtuman sa Ecological Solid Waste Management Act of 2000 (RA 9003).
Ingon man ang kumpanya kay paatubangon sa usa ka technical conference ug pabuhaton og compliance plan sa musunod 90 ka adlaw.
Samtang sa habig sa nagpadayong search, rescue, and retrieval operations kay mitaho ang Bureau of Fire Protection – Central Visayas (BFP-7) nga miabot na sa siyam ihap sa mga nangamatay samtang 12 ang injured nga anaa sa tambalanan ug 27ang padayong pang gipangita.
