CEBU CITY-Gipanglantawan sa kapulisan sa Dakbayan sa Sugbu nga pangpanghadlok ug Personal Grudge ang hinungdan sa pagtusok sa hait nga butang sa mata sa usa ka dentista kinsa gisulod sa duha ka wa mailhing tawo sa iyang klinika sa Queens Road, duol sa Redemptorist Church, sa Barangay Kamputhaw, dakbayan sa Sugbo, gahapon Miyerkules, Hulyo 5.
Sa pakighinabi sa Bombo-Radyo Cebu kang Police Colonel Ireneo Dalogdog, gibutyag niini nga dako ang possiblidad nga pangpanghadlok lamang ang tumong ug tuyo sa duha ka suspetsado, kini gumikan kay walay nawala nga gamit sulod sa Clinic ug wala usab kini misulay sa pagpatay sa Doctor nga giilang si Dr. Charles Pactol Sia, 41, taga dakbayan sa Sugbo.
Kini bisan paman nga adunay dalang pusil ang duha ka armadong lalaki, giklaru usab sa opisyal nga gitusok ang mata sa dentista sukwahi sa mga nanggawas nga taho nga gilugit ang mata niini.
Base sa pakighinabi sa kapulisan sa asawa sa Doctor, nga walay kontra ang iyahang bana, apan nagpa-utang sila ug kwarta ug adunay pipila sa nangutang nga ilahang gipasakaan ug kaso.
Dili pa usab makahatag ug impormasyon ang kapulisan kung makakita paba ang Doctor o dili na, ilabi na nga hangtud sa kasamtangan wala pa gitugutan sa attending physician nga ibaka ang mga mata niini.
Dugang pa sa opisyal nga aduna na silay Person of Interest, apan nagdumili una sila sa pagpagawas niini,samtang nagpadayun pa ang imbistigasyon sa kapulisan ug arun masiguro nga mahatagan ug solusyun ang maong kaso.
Gitataw ni Dalogdog, nga iyaha nang gimanduan ang Abellana Police Station aron mapadali ang imbestigasyon ug masikop ang mga suspek.
