CENTRAL VISAYAS-Gihatagan ug katin-awan sa Department of Education Central Visayas (DepEd 7) ang mga nahitabo sa Marigondon national high school sa Lapu-Lapu City, Cebu, nga giingung nagpahigayon sa ilang junior high school graduation ceremony sa Hoops Dome alas 4 sa kadlawon niadtong Miyerkules, Mayo 29, 2024.
Gitino ni Dr. Salustiano Jimenez, ang Regional Director sa DepEd 7, atul sa pakighinabi sa Bombo Newsteam, nga nakig-estorya siya ni Lapu-Lapu City Schools Division Superintendent Marilyn Andales.
Didto iyahang nasuta nga napugos ang tunghaan sa paghimo og sayo nga seremonyas sa graduation tungod sa memorandum sa DepEd nga nag-ingon nga kinahanglang wala nay graduation rites sa Hunyo.
Kabahin sa alas-kwatro sa kadlawon nga graduation ceremony gihatagan ug katin-awan ni Jimenez, nga dili kadlawon kundili alas 5 sa buntag, kana gumikan kay ang tunghaan adunay kapin sa 1,500 ka junior high school graduates karong tuiga.
Butang nga nagkinahanglan sila ug dako nga Luna alang sa naasoy nga kalihokan.
Una niini, adunay nikatap nga ang call time alas 3 sa kadlawon alang sa seremonyas sa gradwasyon, butang nga-niani ug nagkadaiyang reaksyon sa katawhan.
