CENTRAL VISAYAS-Gisusi sa Department of Education (DepEd-Region 7) ang nag-viral nga video nga nakuhaan og away sa pipila ka estudyante sulod sa classroom sa Jagobiao, Mandaue City sa Sugbo.
Ang video nagpakita sa usa ka lalaki nga estudyante nga gilamba sa blackboard ang usa ka babaye nga estudyante.
Gisundan kini sa usa ka lalaki nga estudyante nga miatake sa babaye nga estudyante, ug didto nahitabo ang away.
Nahitabo ang insidente niadtong Lunes sulod sa classroom samtang wala ang magtutudlo gumikan kay nag emergency leave.
Subay niini gitino ni Dr. Salustiano Jimenez, ang Regional Director sa Department of Education Central Visayas, nga gipatawag sa tagdumala sa tunghaan ang mga tinun-an sa high school nga nalambigit sa kasamok, ingon man ang ilang mga ginikanan aron masayran ang hinungdan sa away ug aron sila husayon.
Dugang pa, nga wala nagdungan nga gipatawag ang mga tinun-an ug mga ginikanan sa mga bata aron di magkainit ang mga ginikanan.
Subay niini, gipahimangnuan ni Dr. Jimenez ang mga tinun-an ug mga kabatan-onan sa pagkontrol sa ilahang mga emosyon ug paghunahuna sa mga lakang nga ilahang pagabuhaton.
Kini gumikan, kay dako kinig epekto sa ilaha ug ingun man sa umaabot.
Padayun usab nga gipalagman ug gipalapdan sa buhatan ang insidente arun sa ingun masayran kung unsay hinungdan nga misangpot sa kagubot.
