Nangandam na karon ang Department Of Health Central Visayas subay sa nagsing-abot nga ika 461 nga kapistahan sa Balaang Bata, diin sa kasamtangan anaa sila sa code white alert status.
Ubos sa ilang pagpangandam, nipahimangno usab sila sa mga contigents sa mga aktibidad sa maong kapistahan nga gikinahanglan anaa sila sa maayong kondisyon sa panglawas, sa dili pa mosalmot sa bisan unsang kalihokan.
Gani sa code white alert nga gipahamtang niadto pang Enero 6, nakadestino na ang nagkadaiyang medical offices ug medical tents nga nagsubay sa rota sa mga agianan sa mga nagkalain-laing aktibidad sama sa Grand Parade igka Domingo, Enero 18.
Gani, sa pakighinabi sa Bombo Radyo Cebu Newsteam kang Dr. Shelbay G. Blanco, Medical Officer IV sa DOH-7, iyang gitataw ang mga pahimangno ug mga tips nga angay pagabuhaton atol sa kasaulogan.
Una na niini mao ang pagdala og payong, paypay, kalo, kapote nga magsilbing panagang sa uwan o init. Ikaduha mao ang pagbawn og makaon nga dili daling mapan-os, ikatulo ang pagbitbit usab og igo nga ilimnong tubig, ika-upat ang pagsul-ob og mga hayahay nga mga sanina ug pagdala og extra shirts, ug ang ikalima mao nga kung mamahimo, dili nalang mosungasong ang mga tiguwang, mabdos,o bata sa maong dinagsa kaayo nga kapistahan.
