CENTRAL VISAYAS-Subay sa pagsaulog sa ika-73 nga anibersaryo nga selebrasyon sa Department of Social Welfare and Development diin gihatagan niini og mga pagpasidungog ang mga empleyado nga nagpakita og talagsaong kugi ug talagsaong performance sa trabaho atol sa bag-o nga nahuman nga Programs on Awards and Incentives for Service Excellence o kon PRAISE.
Ang naasoy nga aktibidad adunat tema nga: “Angels in Red Vests: Empathy in Action, Integrity in Service, Unity in Community.”
Karong tuiga, ang PRAISE Awards adunay upat ka mga dagkong kategorya sama sa special citation, indibidwal, grupo, ug kabag-ohan.
Ubos sa special citations, ang mga awardees gikan sa DSWD FO-7 mao ang Municipal Action Team sa Munisipyo sa Pamplona nga gilangkuban nila ni Jeh Beh Katipunan, Leah Valencia, Junesa Espleguerra, ug Arlene Almosura isip Pusong Magiting; Cebu Warehousing Unit nga gipangulohan ni Valdemar Paloma isip Pusong Maagap sa Mapagkalinga; ug Social Marketing Unit (SMU) nga gipangulohan ni Leah Quintana isip Pusong May Malasakit sa Larangan ng Pampublikong Impormasyon.
Lakip usab ang Cebu City Action Team nga milangkat sa ikatulong puwesto isip Best Convergence Action Team.
Nangulo sa delegasyon sa DSWD-7 ang Regional Director nga si Shalaine Marie Lucero ug giila usab nga unang Angel in Red Vest (Gawad Kalihim) awardee.
Sa iyang mensahe sa pagdawat sa ngalan sa tanang awardees, gipahinungod ni Lucero ang pasidungog sa iyang pamilya sa DSWD-7.
