Gipanglantawan sa gobyerno sa Pilipinas ang pag-establisar og mga direktang biyahe gikan sa Bandar Seri Begawan, ang kapital sa Brunei, paingon sa Cebu ug Clark sa tinguha nga madugangan pa ang pag-abot sa mga turista sa duha ka nasod.
Mao kini ang gipasiugda ni Department of Tourism Secretary Christina Frasco niadtong Miyerkules, Mayo 29, 2024.
Matud ni Frasco nga aduna na’y mga local carrier sama sa Philippine Airlines ug Cebu Pacific ug anaa usab ang Royal Brunei, apan ang tumong mao ang connectivity ug direktang destinasyon sa turismo ngadto sa Cebu ug Clark.
Dugang pa sa opisyal nga subay sa katumanan sa maong plano, makigtambayayaong sila sa Department of Transportation.
Kahinumduman niadtong Martes, Mayo 28, 2024, si Frasco ug usa ka opisyal sa Ministry of Primary Resources and Tourism (MPRT) sa Brunei Darussalam mipirma sa usa ka memorandum of understanding nga nagtumong sa pagmugna ug kooperatiba nga mga proyekto sa turismo ug pagdugang sa pag-abot sa mga turista tali sa duha ka mga nasud, ingon man pagsuporta sa ‘niche’ nga pag-uswag sa turismo ug pagpauswag sa promosyon sa mga destinasyon nga mahigalaon sa Muslim.
