CENTRAL VISAYAS-Giklaro sa buhatan sa Department of Education – Central Visayas (DepEd-7) ang isyu nga nabuak sa kaulohan kabahin sa gipasar nga Commission on Audit (COA) annual audit report niini sa tuig 2023 nga ang DepEd napakyas sa pagsumiter sa Government Service Insurance System (GSIS) premiums ug loan amortization sa mga teaching ug non-teaching personnel.
Kini ang gibutyag sa Regional Director sa DepEd-7 nga si Dr Salustiano Jimenez sa eksklusibong pakighinabi niini sa Bombo Newsteam diin gitataw niya nga dili ang kapakyas sa pagremit sa buhatan ang rason sa report sa COA.
Dugang pa niya nga ang billing lang sa GSIS ang sumbanan sa pagbayad sa ahensya ug aduna lay salary tranche adjustments ang pagabuhaton hinungdan sa maong financial audit report sa COA.
Subay sa maong report nga sa DepEd Central Visayas nakatala kini sa kapin P68.8-milyones sa maong financial record nga giingong wala na-remit ug ubos na kini sukad sa paglingkod sa opisyal isip pangu sa maong buhatan.
Apan matud pa ni Jimenez nga nakig-alayon na ang iyang buhatan sa GSIS Cebu aron sa pagsettle sa maong financial descripancy ingon man nga naglikay kini malapas ug sumiter sa deadline tungod sa tunok nga penalty nga salubagon.
Ang GSIS premium kay usa ka social contribution sa tanang empleyado sa gobyerno nga ang katunga gikan sa mga miyembro ug ang lain katunga sa employers niini.
