CENTRAL VISAYAS-Mipahimangno ang Department of Education (DepEd 7) sa tanang mga pangpubliko nga eskwelahan nga himuong simple ang pagpahigayon sa mga graduation o commencement exercises.
Gibutyag ni Dr. Salustiano Jimenez, ang regional director sa DepEd 7, nga gidili gayud ang pagpangayo ug contributions alang sa maong kalihokan, diin kini aduna na’y budget gikan sa ahensya.
Apan gitino sa opisyal nga kung mismo ang mga ginikanan adunay sinabotan o boluntaryo nga paghatag ug amotan, giingong ilaha kining ikonsiderar, basta lang nga dili kini pinangayo gikan sa magtutudlo, principal o supervisor.
Gidugang ni Dr. Jimenez nga himuong simple ang kalihokan diin dili pugson ang mga tinun-an kung unsa ang ilahang sul-obon gumikan kay wala may ‘specific’ nga instruction gikan sa DepEd kung unsa ang sul-obon sa ilahang graduation, diin mahimo man nga uniporme lang sa eskwelahan.
Gawas pa, kinahanglan nga ipahigayon ang kalihokan sa mga pangpubliko nga pasilidad susama sa eskwelahan mismo, o sa mga barangay o bisan asa nga adunay koordinasyon sa Local Government Unit, ug dili ipahigayon sa mga hotel o sa mga lugar nga gikinahanglan pang mo bayad ug mahal.
Gipasabot ni Jimenez nga ang importante mao ang pagkab-ot sa kamahuloganon sa maong kalihokan alang sa mga tinun-an, ginikanan ug mga magtutudlo.
